दारूच्या पैशांसाठी महिलेच्या घरात घुसून मारहाण! ५७ वर्षीय महिलेला शिवीगाळ करून जखमी केल्याचा आरोप; जीवे मारण्याची धमकी, साखरखेर्डा पोलिसांत गुन्हा दाखल

साखरखेर्डा (गावकरी टाइम्स/जुबेर शाह)

साखरखेर्डा : दारू पिण्यासाठी पैसे देण्यास नकार दिल्याचा राग मनात धरून एका ५७ वर्षीय महिलेच्या घरात जाऊन तिला अश्लील शिवीगाळ करीत मारहाण केल्याची घटना साखरखेर्डा येथील वार्ड क्रमांक ६ मध्ये गुरुवार, १५ ऑक्टोबर रोजी सकाळी साडेअकराच्या सुमारास घडली. या घटनेमुळे परिसरात चर्चेला उधाण आले असून, पीडित महिलेच्या तक्रारीवरून साखरखेर्डा पोलिसांनी आरोपीविरुद्ध गुन्हा दाखल केला आहे.

"आमच्या WhatsApp ग्रुपला जॉईन होण्यासाठी येथे क्लिक करा"

पैसे देण्यास नकार दिल्याने वाद

पोलिसांकडून मिळालेल्या माहितीनुसार, निर्मला रामचंद्र पंचाळ (वय ५७, रा. वार्ड क्रमांक ६, साखरखेर्डा) या गुरुवारी सकाळी आपल्या घरी असताना आरोपी शेख सोरब शेख रहीम ऊर्फ शेरा हा त्यांच्या घरी आला. त्याने दारू पिण्यासाठी पैशांची मागणी केली. मात्र, आपल्याकडे पैसे नसल्याचे निर्मला पंचाळ यांनी सांगितले. यामुळे संतप्त झालेल्या आरोपीने त्यांना अश्लील शिवीगाळ केली. त्यानंतर चापटाबुक्क्यांनी मारहाण करून धक्काबुक्की केल्याचे फिर्यादीत नमूद करण्यात आले आहे.

डोळ्याला व कपाळाला दुखापत; जीवे मारण्याची धमकी

या मारहाणीत निर्मला पंचाळ यांच्या उजव्या डोळ्याच्या तसेच कपाळाच्या भागाला दुखापत झाल्याचे तक्रारीत म्हटले आहे. एवढ्यावरच न थांबता आरोपीने जीवे मारण्याची धमकी दिल्याचाही आरोप करण्यात आला आहे. घरात घडलेल्या या प्रकारामुळे परिसरात चर्चेला सुरुवात झाली आहे.

BNS च्या चार कलमांन्वये गुन्हा दाखल

या प्रकरणी १५ ऑक्टोबर २०२६ रोजी दुपारी ३ वाजून ९ मिनिटांनी साखरखेर्डा पोलीस ठाण्यात गुन्हा क्रमांक ३३०/२०२६ नोंदविण्यात आला आहे. आरोपीविरुद्ध भारतीय न्याय संहिता (BNS) कलम ३३३, २९६, ११५(२) आणि ३५१(३) अन्वये गुन्हा दाखल करण्यात आला आहे.

या प्रकरणाचा पुढील तपास साखरखेर्डा पोलीस करीत आहेत.

बातमी आणि जाहिरात साठी संपर्क करा : ९८६०४९४८०७ ——— बातमी आणि जाहिरात साठी संपर्क करा : ९८६०४९४८०७