शिक्षणप्रवासाचा सुवर्णयोग: ज्या शाळेची पायरी चढले, तिथेच सेवापूर्तीचा गौरव स्वीकारला!पंढरीनाथ जायभाये सर सेवानिवृत्त; भव्य नागरी सत्कार

दाभा (गावकरी टाइम्स/किशोर मोरे) :

लोणार तालुक्यातील हिरडव येथील सरदार वल्लभभाई पटेल हायस्कूलचे मुख्याध्यापक पंढरीनाथ जायभाये सर यांच्या प्रदीर्घ शैक्षणिक सेवेची सांगता ८ ऑगस्ट रोजी त्यांच्या जन्मगावी आरडव येथे अत्यंत उत्साहात पार पडली. ज्या ज्ञानमंदिरात बालपण गेले आणि जिथे विद्यार्थी म्हणून शिक्षणाचे धडे गिरवले, त्याच परिसरात सेवापूर्तीचा गौरव होणे, हा त्यांच्या आयुष्यातील सुवर्णक्षण ठरला.

"आमच्या WhatsApp ग्रुपला जॉईन होण्यासाठी येथे क्लिक करा"

शिक्षण क्षेत्रात प्रदीर्घ काळ सेवा बजावताना जायभाये सरांनी विद्यार्थ्यांना केवळ पुस्तकी ज्ञान न देता शिस्त, संस्कार, कर्तव्यनिष्ठा आणि जीवनमूल्यांची शिकवण दिली. त्यांच्या मार्गदर्शनातून घडलेले अनेक विद्यार्थी आज विविध क्षेत्रांत यशस्वीपणे कार्यरत आहेत. त्यांच्या या उल्लेखनीय शैक्षणिक योगदानाबद्दल आयोजित सेवापूर्ती सोहळ्याला विविध क्षेत्रांतील मान्यवर, शिक्षक, विद्यार्थी आणि ग्रामस्थांची मोठी उपस्थिती लाभली.

मान्यवरांची प्रमुख उपस्थिती

या सोहळ्यास मुख्य अतिथी म्हणून शिक्षक मतदारसंघाचे आमदार किरणराव सरनाईक, संस्थेचे अध्यक्ष भास्करराव सांगळे, गुरुमाऊली सानप सर, गिलवरकर सर, गरकल सर तसेच मुंबई मंत्रालयातील मुख्यमंत्री देवेंद्र फडणवीस यांचे सचिव विजय जायभाये उपस्थित होते.

याशिवाय शिवछत्र मित्र मंडळाचे अध्यक्ष नंदकिशोर मापारी, नीरज रायमुलकर, पांडुरंग सरकटे, अनिकेत मापारी, विजय मोरे, शिवाजी मोरे आणि दशरथ दादा जायभाये यांच्यासह परिसरातील अनेक प्रतिष्ठित नागरिक, शिक्षकवृंद व ग्रामस्थ मोठ्या संख्येने उपस्थित होते.

सपत्नीक सत्कार आणि कृतज्ञता

कार्यक्रमादरम्यान उपस्थितांच्या वतीने मुख्याध्यापक पंढरीनाथ जायभाये सर व त्यांच्या पत्नीचा सपत्नीक भावूक वातावरणात सत्कार करण्यात आला.

सत्काराला उत्तर देताना जायभाये सर भावूक होत म्हणाले,

"ज्या गावच्या ज्ञानमंदिरात बालपण गेले, ज्या शाळेत शिक्षणाचे धडे गिरवले आणि त्याच शिक्षण क्षेत्रात आयुष्यभर सेवा करण्याची संधी मिळाली, हा माझ्यासाठी सर्वोच्च सन्मान आहे."

भावना आणि आठवणींचा संगम

सेवेला विराम मिळाला असला तरी जायभाये सरांनी दिलेले ज्ञान, संस्कार आणि आठवणी कायम स्मरणात राहतील, अशा भावना उपस्थित शिक्षक, माजी विद्यार्थी आणि ग्रामस्थांनी व्यक्त केल्या.

एकंदरीत, जन्मगाव आरडव येथे पार पडलेला हा सेवापूर्ती सोहळा गुरु-शिष्याच्या पवित्र नात्याचा, शिक्षकाच्या समर्पित सेवेचा आणि ज्ञानमंदिरातून घडलेल्या एका आदरणीय व्यक्तिमत्त्वाच्या कार्याचा सार्थ गौरव करणारा ठरला.

बातमी आणि जाहिरात साठी संपर्क करा : ९८६०४९४८०७ ——— बातमी आणि जाहिरात साठी संपर्क करा : ९८६०४९४८०७