गेल्या अनेक दिवसांपासून साखरखेर्डा गावात गाजत असलेल्या क्रीडांगणाच्या वादावर अखेर ग्रामसभेने ऐतिहासिक पडदा टाकला आहे. गावातील गट क्रमांक ८७० मधील १ हेक्टर ६२ आर ही मोक्याची सरकारी जमीन आता कोणत्याही खाजगी संस्थेची न राहता, कायमस्वरूपी 'सार्वजनिक क्रीडांगण' म्हणून राखीव राहणार आहे. १६ जुलै रोजी झालेल्या वादळी पण ऐतिहासिक ग्रामसभेत या प्रस्तावाला गावकऱ्यांनी एकमुखी मंजुरी दिली. निर्णय जाहीर होताच साखरखेर्डा बसस्थानक परिसर युवकांच्या घोषणांनी आणि फटाक्यांच्या आतषबाजीने दणाणून गेला.
तणावानंतर प्रशासकीय मध्यस्थी; काय होता वाद?
सदर जागा शासकीय मालकीची असून अनेक वर्षांपासून गावातील तरुण येथे विविध खेळांचा सराव करत आहेत. मात्र, काही दिवसांपूर्वी या जागेवर अतिक्रमणाच्या हेतूने नांगरणी करण्यात आल्याचा आरोप झाला आणि गावात प्रचंड तणाव निर्माण झाला होता. परिस्थितीचे गांभीर्य ओळखून तहसीलदार अजित दिवटे आणि ठाणेदार युवराज रबडे यांनी तत्परता दाखवत जागेवर 'जैसे थे' आदेश लागू केले होते.
दरम्यान, भाजपचे प्रदेश सदस्य उल्हास देशपांडे यांनी महसूल मंत्री चंद्रशेखर बावनकुळे यांच्याकडे पाठपुरावा करून ही जमीन शासनाच्या नावे नोंदवून घेतली होती. मात्र, 'साखरखेर्डा एज्युकेशन सोसायटी'ने या भूखंडावर दावा सांगत न्यायालयीन लढाई सुरू केल्याने संपूर्ण गावाचे लक्ष या प्रकरणाकडे लागले होते.
ग्रामसभेत ट्विस्ट; संस्थेच्या नावाचा प्रस्ताव फेटाळला!
१६ जुलै रोजी झालेल्या ग्रामसभेत ही जमीन मुलांचे क्रीडांगण आणि ज्येष्ठ नागरिकांच्या विरंगुळ्यासाठी राखीव ठेवण्याचा ठराव मांडण्यात आला. चर्चेदरम्यान गोपाल राजपूत यांनी, "न्यायालयीन निकालानंतर जमीन क्रीडांगणासाठीच ठेवावी, पण नाव संस्थेचे असावे," असा सूर लावला. परंतु, उपस्थित नागरिक आणि आक्रमक युवकांनी हा प्रस्ताव धुडकावून लावला. "जमीन शासनाच्या नावेच राहिली पाहिजे आणि ती पूर्णपणे सार्वजनिकच असायला हवी," अशी ठाम भूमिका गावकऱ्यांनी घेतली आणि ठराव एकमताने मंजूर करण्यात आला.
"जमीन नाही कोणा बापाची..." युवकांचा ऐतिहासिक जल्लोष!
ग्रामसभेत ठराव मंजूर होताच साखरखेर्डा बसस्थानक परिसरात खेळाडू आणि तरुणांनी एकच जल्लोष केला. "जमीन नाही कोणा बापाची, ती आहे सरकारची!" आणि "क्रीडांगण झालेच पाहिजे!" अशा गगनभेदी घोषणांनी परिसर दणाणून गेला. सर्वपक्षीय कार्यकर्ते, खेळाडू आणि ग्रामस्थांनी एकत्र येत फटाके फोडले आणि पेढे वाटून आनंद साजरा केला.
दिग्गजांची उपस्थिती:
या ऐतिहासिक ग्रामसभेला प्रशासकीय सरपंच सौ. ज्योती अमित जाधव, माजी सरपंच पूनम महेंद्र पाटील, रामभाऊ जाधव, उल्हास देशपांडे, दाऊद कुरेशी, चंद्रशेखर शुक्ल, ग्रामपंचायत अधिकारी मनोज मोरे यांच्यासह शेकडो ग्रामस्थ व युवक उपस्थित होते. कार्यक्रमाचे प्रास्ताविक मनोज मोरे यांनी केले, तर सूत्रसंचालन अरुण देशमुख यांनी केले.
थोडक्यात पण महत्त्वाचे...
गावातील भावी पिढीला दर्जेदार क्रीडा सुविधा मिळाव्यात आणि मौल्यवान सरकारी जमीन भूमाफिया किंवा संस्थांच्या घशात न जाता जनहितासाठी वापरली जावी, यासाठी साखरखेर्डा ग्रामसभेने घेतलेला हा निर्णय जिल्ह्यासाठी आदर्श आणि ऐतिहासिक ठरला आहे.
.jpeg)
0 Comments