रिसोड-मेहकर बस सेवा तात्काळ सुरू करा; राहुल बोडखे यांचे आगार व्यवस्थापकांना निवेदन

रिसोड (गावकरी टाइम्स/शेख सिकंदर):रिसोड-मेहकर मार्गावरील बंद असलेली एसटी बस सेवा तात्काळ पूर्ववत सुरू करण्यात यावी, या मागणीसाठी युवक काँग्रेसचे वाशिम जिल्हा प्रवक्ते तथा माजी पंचायत समिती सदस्य राहुल म. बोडखे यांनी रिसोड आगार व्यवस्थापकांना एक निवेदन दिले आहे.

गेल्या दोन वर्षांपासून या मार्गावरील बस सेवा बंद असल्याने परिसरातील प्रवाशांचे मोठे हाल होत आहेत. रस्त्याच्या कामाचे कारण देत ही सेवा बंद करण्यात आली होती, मात्र आता रिसोड ते महागाव पर्यंतच्या रस्त्याचे काम पूर्ण झाले असूनही बस सेवा अद्याप सुरू करण्यात आलेली नाही.

"आमच्या WhatsApp ग्रुपला जॉईन होण्यासाठी येथे क्लिक करा"

विद्यार्थी आणि नागरिकांची कोंडी; खाजगी वाहनांचा आधार

बस सेवा बंद असल्यामुळे महागाव, वाकड, गोहोगॉंव, एकलासपूर, मोहेगाव व परिसरातील शेकडो विद्यार्थ्यांना शिक्षणासाठी रिसोड येथे जाण्या-येण्यासाठी मोठी कसरत करावी लागत आहे. यामुळे विद्यार्थ्यांचे शैक्षणिक नुकसान होत असून त्यांना नाईलाजाने खाजगी वाहनांचा महागडा आधार घ्यावा लागत आहे. तसेच ज्येष्ठ नागरिक, महिला आणि सर्वसामान्य प्रवाशांनाही वाहतुकीच्या सुविधेअभावी मानसिक व आर्थिक त्रासाला सामोरे जावे लागत आहे.

या गावांना मिळणार मोठा दिलासा

जर ही बस सेवा तातडीने सुरू झाली, तर खालील गावांना त्याचा थेट फायदा होणार आहे:

वाकद

महागाव

बाळखेड

गोहोगॉंव

एकलासपूर

वाडी वाकद व परिसरातील इतर गावे

"एसटी महामंडळ ही ग्रामीण भागातील नागरिकांची जीवनवाहिनी आहे. विद्यार्थ्यांचे भविष्य आणि प्रवाशांची गैरसोय लक्षात घेता रिसोड-मेहकर बस सेवा पूर्ववत सुरू करून या मार्गावर नियमित बस फेऱ्या उपलब्ध करून देण्यात याव्यात."

— राहुल म. बोडखे (प्रवक्ते, युवक काँग्रेस, वाशिम)

ग्रामीण भागातील जनतेची ही गरज ओळखून आगार प्रशासनाने यावर तात्काळ सकारात्मक पाऊल उचलावे आणि बस सेवा सुरू करून प्रवाशांना दिलासा द्यावा, अशी मागणी या निवेदनाद्वारे करण्यात आली आहे.

बातमी आणि जाहिरात साठी संपर्क करा : ९८६०४९४८०७ ——— बातमी आणि जाहिरात साठी संपर्क करा : ९८६०४९४८०७