जागतिक प्रसिद्धी लाभलेल्या ऐतिहासिक लोणार नगरीत जैन श्रावक-श्राविकांच्या अभूतपूर्व उत्साहात आणि अत्यंत भक्तिमय वातावरणात महाराष्ट्र प्रवर्तनी परम पूज्य प्रभाकवरजी म.सा. यांच्या सुशिष्या, करुणामूर्ती, पैसठिया छंद आराधिका परम पूज्य किरणसुधाजी म.सा. आणि तेला तप आराधिका पूज्य श्री विशालप्रभाजी म.सा. आदि ठाणा ५ यांचा चातुर्मासिक मंगल प्रवेश सोहळा अत्यंत थाटामाटात व हर्षोल्लासात पार पडला. या प्रवेशामुळे पुढील चार महिने लोणार नगरीमध्ये ज्ञान, ध्यान, तप आणि साधनेची ‘ज्ञान-गंगा’ वाहणार असून सकल जैन समाजात उत्साहाचे वातावरण आहे.
‘गुरुदेव की जय’च्या जयघोषात भव्य शोभायात्रा (वरघोडा)
साध्वीजींच्या मंगल प्रवेशानिमित्त शहरातून भव्य शोभायात्रेचे (वरघोडा) आयोजन करण्यात आले होते. सकाळी १०:३० वाजता सुरू झालेल्या या मंगल यात्रेत भजनी मंडळ, पारंपरिक वेषातील सुवासिनी डोक्यावर मंगल कलश घेऊन सहभागी झाल्या होत्या. तर जैन बांधव पारंपरिक पांढऱ्या वेशभूषेत जयघोष करत संपूर्ण परिसर भक्तिमय करत होते. या भव्य शोभायात्रेचा समारोप स्थानिक धीरज भवन (गेलडा भवन) येथे भव्य धर्मसभेत झाला.
चातुर्मास हा आत्मशुद्धीचा सुवर्णकाळ: प. पू. किरणसुधाजी म.सा.
धर्मसभेत उपस्थित श्रावक-श्राविकांना मार्गदर्शन करताना परम पूज्य किरणसुधाजी म.सा. म्हणाल्या,
"चातुर्मास हा मानवी जीवनातील आत्मशुद्धी आणि आत्मचिंतनाचा सुवर्णकाळ आहे. पावसाळ्यात जशी निसर्गाची प्रकृती बहरते, तद्वतच मानवाने आपल्या अंतर्मनात धर्माची पेरणी करून आत्मिक विकास साधला पाहिजे. लोणारच्या या पवित्र भूमीत चातुर्मासाच्या माध्यमातून अहिंसा, करुणा आणि साधनेचा संदेश घराघरांत पोहोचवणे हेच आमचे मुख्य ध्येय आहे."
विविध धार्मिक उपक्रमांची रेलचेल
या ऐतिहासिक सोहळ्याला लोणार शहरासह संपूर्ण जिल्हाभरातून आणि परराज्यातून हजारो जैन भाविकांनी हजेरी लावली. विशेष म्हणजे सर्वधर्मीय बांधवांच्या उपस्थितीने या सोहळ्याचे सौंदर्य अधिकच खुलले.
पुढील चार महिन्यांच्या काळात लोणार येथील जैन स्थानकात:
गौतम लब्धी जाप अनुष्ठान
रोज सकाळी सामूहिक प्रतिक्रमण
नवकार मंत्र साधना
नित्य मांगलिक प्रवचन
विविध धार्मिक व संस्कार शिबिरे
यांसारख्या विविध धार्मिक कार्यक्रमांचे आयोजन केले जाणार असल्याची माहिती श्रावक संघाच्या वतीने देण्यात आली.
२४ जुलै रोजी प. पू. सुयशप्रज्ञाश्रीजी व सौम्यप्रज्ञाश्रीजी म.सा. यांचा चातुर्मास प्रवेश!
येत्या २४ जुलै रोजी शहरातील बन्सीलाल नगर येथून सकाळी ७:३१ वाजता भव्य शोभायात्रा निघणार आहे. ही यात्रा श्री मुनीसुव्रत श्वेतांबर मूर्तीपूजक जैन उपाश्रय, लोणार येथे पोहोचेल. तेथे प. पू. श्री सुयशप्रज्ञाश्रीजी आणि प. पू. श्री सौम्यप्रज्ञाश्रीजी आदि ठाणा ७ यांचा चातुर्मास मंगल प्रवेश होणार असून, येथेही चातुर्मास काळात विविध तप-साधना व धार्मिक कार्यक्रमांचे आयोजन करण्यात आले आहे.
नियोजन व सहकार्य
या सोहळ्याच्या यशस्वीतेसाठी स्थानिक सकल जैन समाज, वर्धमान स्थानकवासी जैन श्रावक संघ, प्रभा बहु मंडळ, जिनेश्वर युवा ग्रुप, चैतन्य भक्ति मंडळ, गुरु गणेश मिश्री वर्ल्ड ग्रुपचे सर्व पदाधिकारी आणि युवा मंडळाच्या सदस्यांनी मोलाचे परिश्रम घेतले.
.jpeg)
0 Comments