लोणार तालुका ग्रामपंचायत अधिकारी संघटनेची नवीन निवडणूक प्रक्रिया बुधवारी (दि. ८ जुलै २०२६) दुपारी २:०० वाजता पंचायत समितीच्या सभागृहात अत्यंत उत्साहात आणि चुरशीच्या वातावरणात पार पडली. ग्रामपंचायत अधिकारी DNE १३६ जिल्हा बुलढाणा यांच्या पत्र क्र. ८५/२९२६ दिनांक ४/७/२०२६ नुसार या सभेचे आयोजन करण्यात आले होते. या निवडणुकीत अध्यक्षपदासाठी चुरस पाहायला मिळाली, तर उर्वरित सर्व पदांची निवड बिनविरोध करण्यात आली.
अध्यक्षपदासाठी रंजक लढत आणि मतदान प्रक्रिया
सुरुवातीला संघटनेची निवडणूक बिनविरोध व्हावी या उद्देशाने उपस्थित अधिकाऱ्यांनी अध्यक्षपदासाठी भागवत तेजराव ढव्हळे यांचे नाव समोर आणले होते. मात्र, किशोर गणपत भाग्यवंत यांनीही अध्यक्ष होण्याची इच्छा व्यक्त केल्याने पेच निर्माण झाला. जिल्हा संघटनेचे पदाधिकारी आणि लोणार तालुक्यातील ग्रामपंचायत अधिकाऱ्यांनी दोघांना एकमताने तोडगा काढण्यासाठी वेळ दिला.
दोघांमध्ये एकमत न झाल्याने अखेर प्रत्यक्ष निवडणूक घेण्याचे ठरले. यावेळी भागवत ढव्हळे यांनी, "जर माझी बिनविरोध निवड होत असेल तरच मला अध्यक्षपदाची इच्छा आहे," असे स्पष्ट करत अध्यक्षपदाच्या शर्यतीतून स्वतःचे नामनिर्देशन मागे घेतले. त्यानंतर त्यांनी अध्यक्षपदासाठी नंदकिशोर परमेश्वर तेजनकर यांचे नाव पुढे केले.
अखेर तोडगा न निघाल्याने निवडणूक 'चिठ्ठी पद्धतीने' (गुप्त मतदान) घेण्याचा निर्णय झाला. या मतदान प्रक्रियेत एकूण दोन उमेदवार रिंगणात होते. मतदानाअंती, किशोर गणपत भाग्यवंत यांना ७ मते मिळाली, तर नंदकिशोर परमेश्वर तेजनकर यांना २५ मते मिळाली. लोणार तालुक्यातील ग्रामपंचायत अधिकारी बांधवांनी तेजनकर यांना भरघोस मतदान करून बहुमताने विजयी केले. त्यानुसार नंदकिशोर परमेश्वर तेजनकर यांची लोणार तालुका ग्रामपंचायत अधिकारी संघटनेच्या अध्यक्षपदी अधिकृत निवड झाली.
नूतन कार्यकारिणी (इतर सर्व पदे बिनविरोध):
अध्यक्षपदाची निवडणूक झाल्यानंतर उर्वरित कार्यकारिणी पुढीलप्रमाणे बिनविरोध घोषित करण्यात आली:
सचिव: गजानन देविदास लहाने
उपाध्यक्ष: श्रीकृष्ण वाळूकर
उपाध्यक्ष (महिला प्रतिनिधी): चंद्रभागा तांगडे
कोषाध्यक्ष: पुंडलिक करवते
सहसचिव: शेख महमूद शेख उस्मान
संघटक: परमेश्वर पिसे
महिला संघटक: अर्चना बोडके
कायदे सल्लागार: सज्जन गवई आणि संदीप ठाकरे
तालुका मार्गदर्शक: सतीश अंभोरे
प्रसिद्धी प्रमुख: रामदास शिंदे
जिल्हा पदाधिकाऱ्यांचे मार्गदर्शन व सत्कार
सदर निवडणूक प्रक्रिया जिल्हा आणि राज्य संघटनेच्या वरिष्ठ पदाधिकाऱ्यांच्या प्रमुख उपस्थितीत व मार्गदर्शनात पार पडली. यामध्ये राज्य प्रसिद्धी प्रमुख तथा बुलढाणा जिल्हा ग्रामपंचायत अधिकारी संघटनेचे सचिव श्री देवेंद्रजी बर्डे, जिल्हा कार्याध्यक्ष विलास गायकवाड, मेहकर तालुकाध्यक्ष दत्तात्रय काळे आणि ग्रामपंचायत अधिकारी पतसंस्था बुलढाणाचे कोषाध्यक्ष योगेश मुळे उपस्थित होते.
निवडणूक प्रक्रिया शांततेत पार पडल्यानंतर उपस्थित सर्व मान्यवरांच्या हस्ते नवनिर्वाचित कार्यकारिणीचा शाल व पुष्पगुच्छ देऊन जाहीर सत्कार करण्यात आला आणि पुढील वाटचालीस शुभेच्छा देण्यात आल्या. सभेचे आभार प्रदर्शन हरिभाऊ रिंढे यांनी केले. या यशस्वी निवडीबद्दल तालुक्यातील सर्व ग्रामपंचायत अधिकाऱ्यांकडून नूतन कार्यकारिणीचे कौतुक होत आहे.
.jpeg)
0 Comments