बुलढाणा जिल्ह्याच्या शैक्षणिक आणि आरोग्य क्षेत्रात एक नवा इतिहास रचला गेला आहे. 'स्वप्न ते सत्य...!' हे ब्रीदवाक्य सार्थ ठरवत आदर्श बहुउद्देशीय शिक्षण संस्थेने जिल्ह्याला एक ऐतिहासिक भेट दिली आहे. संस्थेच्या दोन दशकांहून अधिक काळाच्या अखंड शैक्षणिक प्रवासातील एक अत्यंत महत्त्वाचा आणि मानाचा टप्पा पार पडला असून, बुलढाणा जिल्ह्यातील पहिल्या खाजगी वैद्यकीय महाविद्यालयास (M.B.B.S.) अधिकृत मान्यता मिळाली आहे. 'माउली मेडिकल कॉलेज, हॉस्पिटल अँड रिसर्च सेंटर, अंजनी खुर्द' या नावाने हे महाविद्यालय आता जिल्ह्यातील वैद्यकीय शिक्षणाची नवी पहाट घेऊन आले आहे.
नेतृत्वाची दूरदृष्टी आणि अथांग परिश्रम
या ऐतिहासिक यशामागे आदर्श बहुउद्देशीय शिक्षण संस्थेचे संस्थापक अध्यक्ष मा. संजूभाऊ लाहोटी यांची दूरदृष्टी, शिक्षण क्षेत्रातील समर्पण, अधिक परिश्रम आणि गुणवत्तापूर्ण शिक्षणाची तळमळ कारणीभूत ठरली आहे. तसेच संस्थेचे सचिव मा. सोमेशभाऊ लाहोटी आणि कोषाध्यक्ष मा. दीपकजी नवगजे यांनी या संपूर्ण मान्यता प्रक्रियेत अत्यंत मोलाचे व भक्कम नेतृत्व करत संस्थेच्या विकासाला एक नवी दिशा दिली.
मेडिकल कॉलेजच्या मान्यतेसाठी आवश्यक असलेल्या प्रत्येक निकषांची पूर्तता करण्यासाठी संस्थेच्या संपूर्ण टीमने, ज्यात प्राचार्य, प्राध्यापक, वैद्यकीय तज्ज्ञ आणि प्रशासकीय अधिकारी समाविष्ट आहेत, अनेक महिन्यांपासून अत्यंत नियोजनबद्ध व काटेकोर प्रयत्न केले. पायाभूत सुविधा, शैक्षणिक गुणवत्ता आणि प्रशासकीय तयारीच्या जोरावरच हे यश प्राप्त झाले आहे.
जिल्ह्यातील विद्यार्थ्यांना मिळणार जागतिक दर्जाचे शिक्षण
या नवीन 'माउली मेडिकल कॉलेज'च्या मान्यतेमुळे आता बुलढाणा जिल्हा आणि परिसरातील ग्रामीण भागातील विद्यार्थ्यांना वैद्यकीय शिक्षणासाठी (M.B.B.S.) बाहेर जाण्याची गरज भासणार नाही. त्यांना स्थानिक पातळीवरच जागतिक दर्जाचे शिक्षण आणि आधुनिक आरोग्य सेवा उपलब्ध होणार आहेत. यामुळे या परिसरात आरोग्यसेवा, संशोधन आणि मोठ्या प्रमाणावर रोजगार निर्मितीला चालना मिळणार आहे.
संस्थेचा प्रेरणादायी शैक्षणिक प्रवास
डी.एड., बी.एड., पॉलिटेक्निक, डी.फार्म., आयुर्वेद, बी.एस्सी. (क्लिनिकल लॅबोरेटरी सायन्स), बी.डिझाईन, बी.फार्म., नर्सिंग आणि होमिओपॅथिक मेडिकल कॉलेज अशा अनेक यशस्वी टप्प्यांनंतर आता 'माउली मेडिकल कॉलेज' (M.B.B.S.) च्या रूपाने संस्थेने आपल्या यशाच्या मुकुटात मानाचा तुरा रोवला आहे.
"स्वप्न पाहणारे अनेक असतात; पण त्या स्वप्नांना सत्यात उतरवण्यासाठी दूरदृष्टी, सातत्य, जिद्द आणि समर्पण आवश्यक असते. आदर्श बहुउद्देशीय शिक्षण संस्थेचा आजवरचा प्रवास हे त्याचेच एक जिवंत आणि प्रेरणादायी उदाहरण आहे."
या ऐतिहासिक आणि अभिमानास्पद यशाबद्दल संस्थेचे सर्व पदाधिकारी, प्राचार्य, प्राध्यापक, अधिकारी, कर्मचारी, विद्यार्थी आणि पालकांचे सर्व स्तरांतून कौतुक होत असून, संपूर्ण जिल्हयातून संस्थेवर अभिनंदनाचा वर्षाव होत आहे!
.jpeg)
0 Comments