लोणार (गावकरी टाईम्स/प्रतिनिधी):
प्रधानमंत्री आवास योजना तसेच आर्थिकदृष्ट्या मागास प्रवर्गातील घरकुल लाभार्थ्यांसाठी एक अत्यंत महत्त्वाची आणि आनंदाची बातमी आहे. शासनाच्या नवीन धोरणानुसार पात्र लाभार्थ्यांना घरकुल बांधकामासाठी ५ ब्रास रेती मोफत उपलब्ध करून देण्याची सुविधा सुरू करण्यात आली आहे. या सुविधेचा लाभ घेण्यासाठी लाभार्थ्यांनी ९ जूनपर्यंत आवश्यक कागदपत्रांसह अर्ज करावा, असे आवाहन लोणारचे तहसीलदार भूषण पाटील यांनी केले आहे.
'या' रेती घाटांवरून मिळणार रेती
महसूल व वन विभागाच्या ८ एप्रिल २०२५ च्या शासन निर्णयानुसार लोणार तालुक्यातील खालील रेती घाटांचा लिलाव झाला असून, तिथून रेती वाहतूक सुरू आहे:
सावरगाव तेली-अ
सावरगाव तेली चांगेफळ
भुमराळा
खापरखेड लाड-अ
खापरखेड
'आधी येणाऱ्यास प्राधान्य' आणि वाहतूक खर्च स्वतःचा
शासनाच्या नियमानुसार, प्रधानमंत्री आवास योजना व इतर घरकुल योजनांतील पात्र लाभार्थ्यांना जास्तीत जास्त ५ ब्रास रेती विनामूल्य दिली जाईल. हे वाटप ‘फर्स्ट कम, फर्स्ट सर्व्ह’ (आधी येणाऱ्यास आधी प्राधान्य) या तत्त्वावर केले जाणार आहे. रेती पूर्णपणे मोफत असली, तरी घाटावरून रेती घरापर्यंत नेण्याचा वाहतूक खर्च लाभार्थ्यांना स्वतः करावा लागणार आहे.
कागदपत्रे आणि मंजुरी प्रक्रिया:
घरकुल बांधकामाचा प्रमाणित आराखडा (नकाशा) आणि आवश्यक कागदपत्रांच्या आधारे लाभार्थ्यांना रेती मंजूर केली जाईल. ऑनलाईन प्रणालीमध्ये लाभार्थ्यांची माहिती आधीच उपलब्ध आहे. आवश्यक तपशील सादर केल्यानंतर, ओटीपी (OTP) द्वारे पडताळणी करून रेती मंजुरीची प्रक्रिया तत्काळ पूर्ण केली जात आहे.
मध्यस्थांना बळी पडू नका; थेट संपर्क करा!
या योजनेत पारदर्शकता राहावी आणि लाभार्थ्यांना वेळेत रेती मिळावी यासाठी तहसील प्रशासनाने विशेष व्यवस्था केली आहे. कोणत्याही मध्यस्थाचा (दलालाचा) आधार न घेता, पात्र लाभार्थ्यांनी थेट प्रशासनाशी संपर्क साधावा, असे तहसीलदारांनी स्पष्ट केले आहे.
माहितीसाठी विशेष कक्ष सुरू
रेती वितरणासंदर्भातील मार्गदर्शन, माहिती व आवश्यक सहकार्यासाठी लोणार तहसील कार्यालयात एक विशेष कक्ष सुरू करण्यात आला आहे. अधिक माहितीसाठी लाभार्थ्यांनी आपल्या संबंधित मंडळ अधिकारी कार्यालय किंवा तहसील कार्यालयाशी त्वरित संपर्क साधावा, असे आवाहन प्रशासनाने केले आहे.
.jpeg)
0 Comments