लोणार: विहिरीत निघाले १२ साप; सर्पमित्रांनी दाखवले धाडस, मजुरांचा जीव भांड्यात पडला!

लोणार/मोहोतखेड (गावकरी टाईम्स/प्रतिनिधी): तालुक्यातील मोहोतखेड येथे एका शेतातील विहिरीचे काम सुरू असताना तब्बल १२ साप आढळून आल्याने परिसरात एकच खळबळ उडाली होती. मात्र, सर्पमित्रांनी जीवाची पर्वा न करता या सर्व सापांचे यशस्वी रेस्क्यू करून त्यांना निसर्गाच्या सानिध्यात मुक्त केले आहे.

 

"आमच्या WhatsApp ग्रुपला जॉईन होण्यासाठी येथे क्लिक करा"

नेमकी घटना काय?

मोहोतखेड येथील शेतकरी महेश अरुण दांडगे यांच्या शेतात सध्या विहिरीचे काम सुरू आहे. काम सुरू असताना अचानक विहिरीत ६ ते ७ साप दिसून आले. मोठ्या संख्येने साप दिसल्यामुळे काम करणाऱ्या मजुरांमध्ये भीतीचे वातावरण पसरले आणि त्यांनी विहिरीचे काम तातडीने बंद केले.

सर्पमित्रांची तत्परता

या घटनेची माहिती मिळताच शेतकरी महेश दांडगे यांनी 'निसर्ग मल्टीपर्पज संस्थे'चे अध्यक्ष व सर्पमित्र विनय कुलकर्णी यांच्याशी संपर्क साधला. घटनेचे गांभीर्य ओळखून त्यांनी तातडीने सर्पमित्र विजय नरवाडे यांना घटनास्थळी पाठवले.

विजय नरवाडे यांनी आपले सहकारी अजय अवचार यांच्या मदतीने मोठ्या धाडसाने विहिरीत उतरून शोधमोहीम राबवली. यावेळी त्यांना ७ मोठे साप आणि ५ पिल्ले असे एकूण १२ साप मिळून आले. या सर्व सापांना अत्यंत सुरक्षितपणे पकडून बरणीत आणि पिशवीत जेरबंद करण्यात आले.

जनजागृती आणि कौतुक

रेस्क्यू ऑपरेशन यशस्वी झाल्यानंतर सर्व सापांना त्यांच्या नैसर्गिक अधिवासात सुरक्षितपणे सोडण्यात आले. यावेळी सर्पमित्रांनी उपस्थित शेतकरी आणि नागरिकांना सापांविषयी मोलाची माहिती दिली. सर्पदंश टाळण्यासाठी कोणती काळजी घ्यावी आणि सापांना न मारता सर्पमित्रांशी संपर्क कसा साधावा, याबाबत मार्गदर्शन केले.

सर्पमित्रांच्या या धाडसी आणि तत्पर कामगिरीचे मोहोतखेड परिसरात सर्वत्र कौतुक होत आहे. या यशस्वी मोहिमेमुळे मजुरांनी आणि शेतकऱ्याने सुटकेचा निश्वास टाकला आहे.

बातमी आणि जाहिरात साठी संपर्क करा : ९८६०४९४८०७ ——— बातमी आणि जाहिरात साठी संपर्क करा : ९८६०४९४८०७