"सुलतानपूरमध्ये शेतकऱ्यांचे हाल! डॉक्टर साहेब गायब, मुकी जनावरे उपचाराविना ताटकळत. नक्की पहा ही सविस्तर बातमी."

सुलतानपूर (गावकरी टाइम्स/अयुब खान): सुलतानपूर हे परिसरातील अनेक खेड्यांचे केंद्रस्थान असल्याने येथील पशुवैद्यकीय दवाखान्यावर शेकडो शेतकऱ्यांची भिस्त असते. मात्र, येथील पशुवैद्यकीय अधिकारी डॉ. नेवरे यांच्या मनमानी कारभारामुळे शेतकऱ्यांना नाहक मनस्ताप सहन करावा लागत आहे. डॉक्टर सतत गैरहजर राहत असल्याने उपचारासाठी आणलेल्या मुक्या जनावरांचे हाल होत असून, शेतकऱ्यांमध्ये तीव्र संताप व्यक्त केला जात आहे. 

 नेमका प्रकार काय? 

मंगळवार, २१ एप्रिल २०२६ रोजी सकाळी ८:३० वाजेपासूनच अनेक शेतकरी आपली आजारी जनावरे घेऊन दवाखान्यात हजर झाले होते. मात्र, १० वाजेपर्यंत डॉक्टरांचा पत्ता नसल्याने शेतकऱ्यांची मोठी तारांबळ उडाली. काही शेतकरी नाईलाजाने आपली जनावरे परत घेऊन गेले, तर रवींद्र मोरे, समाधान नानापुरे, मुक्तार शहा, सायराबी पठाण यांसारखे अनेक शेतकरी उन्हात उपाशीपोटी डॉक्टरांची वाट पाहत बसले होते. 

 प्रतिनिधींच्या हस्तक्षेपानंतर डॉक्टर अवतरले! 

शेतकऱ्यांनी या प्रकाराबाबत प्रतिनिधी सुरेश मोरे यांना दूरध्वनीवरून माहिती दिली. मोरे यांनी तातडीने घटनास्थळी धाव घेऊन डॉ. नेवरे यांच्याशी संपर्क साधला. तेव्हा कुठे एक तासानंतर डॉक्टर साहेब दवाखान्यात हजर झाले आणि जनावरांवर उपचार सुरू केले. 

 दवाखान्याची दुरवस्था आणि स्वच्छतेचा अभाव:

 केवळ गैरहजेरीच नव्हे, तर दवाखान्याच्या परिसराचीही मोठी दुर्दशा झाली आहे. दवाखान्यात कुठेही कामाची वेळ दर्शवणारा फलक किंवा सूचना फलक लावलेला नाही. परिसरात सर्वत्र कचरा आणि अस्वच्छतेचे साम्राज्य पसरले आहे. "लोका सांगे ब्रह्मज्ञान आणि आपण कोरडे पाषाण" या उक्तीप्रमाणे डॉक्टर लोकांना स्वच्छतेचे धडे देतात, मात्र स्वतःच्या दवाखान्यात स्वच्छतेचा पत्ता नाही, अशी खोचक टीका नागरिक करत आहेत. याबाबत डॉ. नेवरे यांना विचारणा केली असता त्यांनी उडवाउडवीची उत्तरे देऊन वेळ मारून नेण्याचा प्रयत्न केला. आता याप्रकरणी वरिष्ठ पशुवैद्यकीय अधिकारी लक्ष देऊन डॉ. नेवरे यांच्यावर कठोर कारवाई करणार का? दवाखान्याचा परिसर स्वच्छ होऊन शेतकऱ्यांची सोय होणार का? याकडे सर्वांचे लक्ष लागले आहे.

"आमच्या WhatsApp ग्रुपला जॉईन होण्यासाठी येथे क्लिक करा"

बातमी आणि जाहिरात साठी संपर्क करा : ९८६०४९४८०७ ——— बातमी आणि जाहिरात साठी संपर्क करा : ९८६०४९४८०७