दिल्लीमध्ये आंदोलन करणाऱ्या विद्यार्थ्यांवर झालेल्या कथित लाठीचार्जच्या घटनेचे तीव्र पडसाद मेहकर शहरात उमटले आहेत. या अत्याचाराच्या निषेधार्थ २२ जुलै रोजी मेहकर येथे भव्य स्वाक्षरी आंदोलन छेडण्यात आले. या आंदोलनादरम्यान शिवसेना (उद्धव बाळासाहेब ठाकरे) पक्षाचे आमदार सिद्धार्थ खरात यांनी केंद्र सरकार आणि केंद्रीय शिक्षणमंत्र्यांवर जोरदार हल्लाबोल केला.
"तरुणाईवर लाठ्या चालवणे लोकशाहीसाठी लज्जास्पद"
स्वाक्षरी आंदोलनात बोलताना आमदार सिद्धार्थ खरात कमालीचे आक्रमक झालेले पाहायला मिळाले. "भविष्यातील राष्ट्रनिर्माते असलेल्या तरुण विद्यार्थ्यांवर अशा प्रकारे लाठ्या चालवल्या जात असतील, तर ही अत्यंत संतापजनक आणि लोकशाहीला काळीमा फासणारी बाब आहे," असा घणाघात त्यांनी केला. जखमी विद्यार्थ्यांची अवस्था पाहून मन हेलावून जात असल्याचे सांगत त्यांनी केंद्रीय शिक्षणमंत्री धर्मेंद्र प्रधान यांच्या तात्काळ राजीनाम्याची आक्रमक मागणी केली.
शिवसैनिकांची मोठी उपस्थिती
या निदर्शनांमध्ये शिवसेना (उद्धव बाळासाहेब ठाकरे) पक्षाचे स्थानिक लोकप्रतिनिधी आणि कार्यकर्ते मोठ्या संख्येने सहभागी झाले होते. आंदोलनाला नगराध्यक्ष किशोर गारोळे, युवासेना प्रमुख ॲड. आकाश घोडे, शहरप्रमुख निंबाजी पांडव, नगरसेवक महेश रिंढे, अमर घोडे, नितीन तुपे, सतीश ताजने, संदीप गवई आणि गोपाळ गायकवाड यांच्यासह अनेक प्रमुख पदाधिकाऱ्यांची उपस्थिती होती. उपस्थितांनी केंद्र सरकारच्या धोरणांचा तीव्र शब्दांत निषेध नोंदवला.
.jpeg)
0 Comments