अनुसूचित जातींच्या (SC) उपवर्गीकरणाचा डाव उधळून लावण्यासाठी आणि घटनात्मक हक्कांच्या रक्षणासाठी सिंदखेडराजात जनआक्रोशाचा ज्वालामुखी उसळला! 'अनुसूचित जाती उपवर्गीकरण विरोधी संघर्ष समिती'च्या हाकेवर हजारो समाजबांधव, महिला आणि युवक रस्त्यावर उतरले. निळ्या वादळाची लाट आणि "जय भीम, जय संविधान" च्या गगनभेदी घोषणांनी संपूर्ण सिंदखेडराजा शहर हादरून गेले.
शासकीय विश्रामगृह येथून निघालेला हा अतिविराट मोर्चा शहरातील प्रमुख मार्गांवरून एल्गार पुकारत थेट उपविभागीय अधिकारी कार्यालयावर धडकला. तेथे मोर्चाचे रुपांतर एका महासभेत झाले. त्यानंतर उपविभागीय अधिकारी डॉ. संजय खडसे आणि तहसीलदार अजित दिवटे यांच्यामार्फत मुख्यमंत्र्यांना आपल्या मागण्यांचे तिखट निवेदन सादर करण्यात आले.
समानता आणि हक्कांवर दरोडा खपवून घेणार नाही!
संत सावता महाराज मैदानात झालेल्या जाहीर सभेत विविध वक्त्यांनी शासनाच्या उपवर्गीकरणाच्या प्रस्तावावर चौफेर हल्ला चढवला.
"उपवर्गीकरणाचा निर्णय म्हणजे संविधानाने दिलेल्या समानता आणि सामाजिक न्यायाच्या तत्त्वांना सुरुंग लावण्याचा प्रयत्न आहे. राज्यातील ५९ पैकी ५८ अनुसूचित जातींचा या निर्णयाला तीव्र विरोध असताना हा घाट कशासाठी?" असा थेट सवाल वक्त्यांनी यावेळी उपस्थित केला.
निवेदनातील ६ प्रमुख आणि थेट मागण्या:
१. उपवर्गीकरण रद्द करा: अनुसूचित जाती उपवर्गीकरणाची संपूर्ण प्रक्रिया तात्काळ थांबवून रद्द करण्यात यावी.
२. बदर आयोग रद्द करा: माजी न्यायमूर्ती अनंत बदर आयोगाचा अहवाल त्वरित सार्वजनिक करावा आणि एक सदस्यीय समिती तात्काळ बरखास्त करावी.
३. सामाजिक-आर्थिक सर्वेक्षण: अनुसूचित जाती घटकांचे सर्वसमावेशक सामाजिक, शैक्षणिक व आर्थिक सर्वेक्षण करून वस्तुस्थिती मांडणारा अहवाल जाहीर करावा.
४. अनुशेष (Backlog) भरा: शासकीय व निमशासकीय सेवांमधील मागासवर्गीयांची रिक्त असलेली सर्व अनुशेष पदे युद्धपातळीवर भरावीत.
५. विद्यार्थी सक्षमीकरण: विद्यार्थ्यांसाठी वसतिगृहे, शिष्यवृत्ती, कौशल्य विकास आणि स्पर्धा परीक्षा मार्गदर्शनाचा दर्जा व सुविधा वाढवाव्यात.
६. घटनात्मक संरक्षण: संविधानातील कलम १४, १५(१), १६(१) आणि ३४१ मधील मूळ तत्त्वांचे रक्षण केले जावे.
दखल न घेतल्यास राज्यभर वणवा पेटणार!
शासनाने या रास्त मागण्यांची तातडीने दखल न घेतल्यास हा लढा केवळ तालुक्यापुरता मर्यादित न राहता संपूर्ण बुलढाणा जिल्ह्यासह राज्यभर अधिक तीव्र व आक्रमक केला जाईल, असा स्पष्ट इशारा संघर्ष समिती आणि आंबेडकरवादी संघटनांच्या पदाधिकाऱ्यांनी दिला आहे.
२९ जुलैला बुलढाण्यात आनंदराज आंबेडकरांची तोफ धडकणार!
उपवर्गीकरणाविरोधातील ही लढाई आता अधिक तीव्र होणार असून २९ जुलै रोजी बुलढाणा येथे अतिविराट मोर्चाचे आयोजन करण्यात आले आहे. या महामोर्चाचे नेतृत्व थेट समाजनेते आनंदराज आंबेडकर करणार असल्याची माहिती आंदोलकांनी दिली असून, संपूर्ण जिल्ह्यातून हजारो नागरिकBulldhana येथे एकत्र येणार आहेत.
निळ्या सैनिकांची शिस्त ठरली कौतुकाचा विषय!
हजारोंच्या संख्येने लोक एकत्र आले असले, तरी 'समता सैनिक दला'च्या स्वयंसेवकांनी दाखवलेले अतिशय शिस्तबद्ध नियोजन सर्वांचे लक्ष वेधून घेणारे ठरले. पूर्णपणे शांततापूर्ण, संघटित आणि अनुशासित मार्गाने पार पडलेल्या या मोर्चाच्या व्यवस्थापनाचे शहरात सर्वत्र कौतुक होत आहे.
.jpeg)
0 Comments