"शाळेचा पहिला दिवस ठरला शेवटचा! शाळेच्या गप्पा मारत झोपलेल्या ६ वर्षीय 'राज'चा सर्पदंशाने दुर्दैवी अंत"

डोणगाव (गावकरी टाइम्स/विशेष प्रतिनिधी):

मेहकर तालुक्यातील राजगड गावात एक अत्यंत मन हेलावून टाकणारी आणि हृदयद्रावक घटना समोर आली आहे. नियतीच्या क्रूर घातामुळे केवळ ६ वर्षांच्या 'राज अभिषेक राठोड' या चिमुकल्याचा सर्पदंशाने अकाली मृत्यू झाला आहे. ज्या मुलाने आदल्या दिवशीच आपल्या आयुष्यातील शाळेचा पहिला पाऊल टाकला होता, त्याचाच दुसऱ्या दिवशी असा दुर्दैवी अंत झाल्याने संपूर्ण राजगड गावावर दुःखाचा डोंगर कोसळला असून परिसरात तीव्र हळहळ व्यक्त होत आहे.

"आमच्या WhatsApp ग्रुपला जॉईन होण्यासाठी येथे क्लिक करा"

शाळेच्या पहिल्या दिवसाचा आनंद ठरला अखेरचा

मिळालेल्या माहितीनुसार, २ जुलै रोजी अभिषेक राठोड यांनी त्यांचा लाडका मुलगा राज याचा डोणगाव येथील 'जीवन विकास कॉन्व्हेंट'मध्ये पहिलीत प्रवेश केला होता. शाळेचा पहिला दिवस राजसाठी खूप आनंदाचा ठरला होता. शाळेतून घरी आल्यानंतर त्याने वर्गातील गमतीजमती, नवीन मित्र आणि शिक्षकांबद्दलचा आपला अनुभव आई आणि लहान बहीण अक्षरा हिच्याशी अत्यंत उत्साहाने शेअर केला होता. रात्रीसुद्धा तो शाळेच्या पहिल्या दिवसाच्या गप्पा मारत मारतच आपल्या आईजवळ झोपी गेला होता. ३ जुलै रोजी सकाळी लवकर उठून पुन्हा शाळेत जायचे आहे, याच विचाराने तो झोपला होता; परंतु काळ त्याच्यावर झडप घालणार याची पुसटशीही कल्पना कोणाला नव्हती.

मध्यरात्री काय घडले?

३ जुलैच्या रात्री साधारणतः १२ वाजण्याच्या सुमारास अचानक वीज गेली. प्रचंड उकाडा होत असल्यामुळे घरात हवा यावी यासाठी अभिषेक राठोड यांनी घराचा मुख्य दरवाजा उघडा ठेवला होता. याच दरम्यान साधारण १ वाजण्याच्या सुमारास राज झोपेतून दचकून उठला आणि रडू लागला. त्याच्या पायाला काहीतरी चावल्याचे पाहून सुरुवातीला आई-वडिलांना वाटले की उंदीर किंवा तत्सम काहीतरी चावले असावे, त्यामुळे त्यांनी त्याला जवळ घेऊन शांत केले.

मात्र, रात्री २ ते २:३० वाजण्याच्या सुमारास राजला असह्य वेदना होऊ लागल्या आणि त्याचा पाय हळूहळू निळा पडू लागला. ही गंभीर परिस्थिती पाहताच तो सर्पदंश असल्याचे पालकांच्या लक्षात आले.

रुग्णालयात पोहोचण्यापूर्वीच वाटेतच सोडले प्राण

परिस्थितीचे गांभीर्य ओळखून पालकांनी राजला उपचारासाठी तातडीने डोणगावच्या दिशेने रुग्णालयात नेण्यासाठी धावपळ सुरू केली. परंतु, नियतीला काही वेगळेच मंजूर होते. विष शरीरात वेगाने पसरल्यामुळे रुग्णालयात पोहोचण्यापूर्वीच वाटेतच राजची प्राणज्योत मालवली.

घरातील खोक्यात लपला होता साप

घटनेनंतर ग्रामस्थांनी घरात शोध घेतला असता, राजला चावलेला तो विषारी साप घरातील पलंगाजवळ असलेल्या एका खोक्यात लपून बसलेला आढळून आला.

या धक्कादायक आणि दुर्दैवी घटनेमुळे राजगड गावातील प्रत्येक घरातील चूल आज पेटली नाही. एका निष्पाप चिमुकल्याच्या अशा अकाली निधनाने संपूर्ण गाव शोकसागरात बुडाले असून, राठोड कुटुंबावर झालेल्या या आघातामुळे त्यांच्या वेदना शब्दांच्या पलीकडे आहेत.

बातमी आणि जाहिरात साठी संपर्क करा : ९८६०४९४८०७ ——— बातमी आणि जाहिरात साठी संपर्क करा : ९८६०४९४८०७