लोणार तालुक्यातील पिंपळनेर येथील जागा अतिक्रमणमुक्त करण्यासाठी समाजबांधवांचा एल्गार; 'जय लहुजी, जय अण्णाभाऊ'च्या घोषणांनी परिसर दणाणला!
क्रांतिवीर वस्ताद वीर लहुजी साळवे आणि साहित्यसम्राट लोकशाहीर अण्णाभाऊ साठे यांच्या स्मारकासाठी राखीव असलेली जागा अतिक्रमणमुक्त करून ती समाजाच्या ताब्यात द्यावी, या प्रमुख मागणीसाठी ज्येष्ठ समाजसेवक अनिलकुमार अर्जुनराव कांबळे यांच्या नेतृत्वाखाली सुरू असलेले आमरण उपोषण आज दुसऱ्या दिवशीही सुरूच आहे. वादळी वारे आणि मुसळधार पावसासारख्या अत्यंत प्रतिकूल परिस्थितीतही आंदोलनकर्त्यांनी चक्क सरणावर बसून आपला निर्धार कायम ठेवला आहे. मात्र, दोन दिवस उलटून गेले तरी प्रशासनाने याची कोणतीही ठोस दखल न घेतल्यामुळे आंदोलनकर्ते आणि समाजबांधवांमध्ये तीव्र संतापाची लाट उसळली आहे.
पंचायत समिती कार्यालयासमोर सुरू असलेल्या या आंदोलनात 'द ग्रेट क्रांतिवीर लहुजी टायगर सेना'चे गजानन अंभोरे यांच्यासह अनेक कार्यकर्ते आणि समाजबांधव सक्रियपणे सहभागी झाले आहेत. "महापुरुषांच्या स्मारकासाठी न्याय मिळाल्याशिवाय एक पाऊलही मागे हटणार नाही," असा आक्रमक पवित्रा आंदोलनकर्त्यांनी घेतला आहे.
आंदोलनकर्त्यांनी प्रशासनावर अत्यंत गंभीर आरोप केले आहेत. पिंपळनेर येथील संबंधित जागा गेल्या ३५ ते ४० वर्षांपासून महापुरुषांच्या स्मारकासाठी राखीव ठेवण्यात आली होती. परंतु, काही प्रवृत्तींनी येथील तार कुंपण तोडून जागेवर बेकायदेशीरपणे अतिक्रमण केले आहे. या संदर्भात वारंवार लेखी निवेदने देऊनही प्रशासनाने ढिम्म भूमिका घेतल्याने, अखेर समाजबांधवांना आमरण उपोषणाचे टोकाचे पाऊल उचलावे लागले.
वारंवार निवेदने देऊनही प्रशासन सुस्त!
प्रशासनाच्या कार्यपद्धतीवर आता मोठे प्रश्नचिन्ह निर्माण झाले आहे. आंदोलनकर्त्यांनी १ एप्रिल, ६ एप्रिल, ३ मे आणि ११ मे २०२६ रोजी तहसील कार्यालय व पंचायत समितीकडे वारंवार लेखी निवेदने दिली होती. प्रशासनाला कारवाईसाठी २२ जूनपर्यंतची अंतिम मुदतही देण्यात आली होती. मात्र, प्रशासनाने या संवेदनशील विषयाकडे पूर्णपणे दुर्लक्ष केल्यामुळेच आज ही परिस्थिती निर्माण झाल्याचा आरोप होत आहे.
...तर राज्यभर तीव्र आंदोलन: गजानन अंभोरे यांचा इशारा
"उपोषणकर्त्यांच्या मागण्या तातडीने मान्य करून स्मारकाची जागा समाजाच्या ताब्यात देण्यात आली नाही, तर समस्त मातंग समाजाच्या वतीने राज्यभर तीव्र आणि ऐतिहासिक आंदोलन उभारण्यात येईल. भर पावसात, उघड्या आकाशाखाली सरणावर बसलेल्या आमच्या कार्यकर्त्यांच्या जिवाला काही बरे-वाईट झाल्यास, त्याची सर्वस्वी जबाबदारी केवळ आणि केवळ प्रशासनाचीच राहील!"
— गजानन अंभोरे (नेते, द ग्रेट क्रांतिवीर लहुजी टायगर सेना)
सध्या या अनोख्या आणि अंगावर काटा आणणाऱ्या आंदोलनाने संपूर्ण बुलढाणा जिल्ह्याचे लक्ष वेधून घेतले आहे. 'जय लहुजी... जय अण्णाभाऊ!' च्या घोषणांनी संपूर्ण परिसर दणाणून गेला आहे. आता या आंदोलनाची दाहकता पाहून तरी प्रशासन जागे होणार की आंदोलनाला आणखी उग्र वळण लागणार, याकडे सर्वांचे डोळे लागले आहेत.
.jpeg)
0 Comments