आरडवच्या शिरपेचात मानाचा तुरा: वार्ताहराचा मुलगा राज्यात पाचवा; दीपक जायभाये यांची PSI पदी झेप!

लोणार (गावकरी टाइम्स/किशोर मोरे): कष्टाची जिद्द आणि योग्य संस्कारांची जोड मिळाली की यशाला गवसणी घालता येते, हे लोणार तालुक्यातील आरडव येथील सुपुत्राने सिद्ध करून दाखवले आहे. महाराष्ट्र लोकसेवा आयोगातर्फे (MPSC) घेण्यात आलेल्या खात्याअंतर्गत पोलीस उपनिरीक्षक (PSI) परीक्षेचा निकाल जाहीर झाला असून, यामध्ये दीपक आसाराम जायभाये यांनी महाराष्ट्रातून पाचवा क्रमांक पटकावत ऐतिहासिक यश संपादन केले आहे.

 

"आमच्या WhatsApp ग्रुपला जॉईन होण्यासाठी येथे क्लिक करा"

पत्रकारितेचा वारसा आणि कर्तृत्वाचा प्रवास

दीपक जायभाये हे  माजी ज्येष्ठ वार्ताहर आसाराम जायभाये यांचे सुपुत्र आहेत. वडिलांनी आयुष्यभर लेखणीच्या माध्यमातून सामाजिक प्रश्नांना वाचा फोडली, तर मुलाने पोलीस दलात अधिकारी होऊन जनसेवेचा वसा हाती घेतला आहे. पत्रकार कुटुंबातील या यशामुळे परिसरातून त्यांच्यावर कौतुकाचा वर्षाव होत आहे.

अशी राहिली यशाची आकडेवारी

दीपक यांनी या परीक्षेत अत्यंत चुरशीची कामगिरी केली आहे:

मुख्य परीक्षा: ३०० पैकी २७३.५ गुण.

शारीरिक चाचणी: १०० पैकी १०० गुण (पूर्णांक).

एकूण गुण: ४०० पैकी ३७३.५ मिळवून राज्यात पाचवे स्थान.

संघर्ष आणि जिद्दीची यशोगाथा

दीपक यांचा हा प्रवास सोपा नव्हता. २०११ मध्ये त्यांनी CRPF मध्ये भरती होऊन देशसेवेला सुरुवात केली होती. मात्र, काही कारणास्तव २०१३ मध्ये त्यांनी ती नोकरी सोडली. त्यानंतर २०१६ मध्ये त्यांची अमरावती पोलीस दलात पोलीस शिपाई म्हणून निवड झाली. कर्तव्यावर असतानाही त्यांनी अधिकारी होण्याचे स्वप्न उराशी बाळगले होते.

"२०२२ मध्ये अवघ्या एका गुणाने हुकलेली संधी ही हार नव्हती, तर ती यशाची पुढील पायरी होती. खचून न जाता सातत्य ठेवल्यामुळेच आज हे यश मिळाले," अशा भावना दीपक यांनी व्यक्त केल्या.

शिक्षण आणि ग्रामीण भागाचा अभिमान

आरडव येथे प्राथमिक, हिरडव येथे माध्यमिक आणि लोणारच्या भगवान बाबा महाविद्यालयात त्यांनी उच्च शिक्षण पूर्ण केले. ग्रामीण भागातील सुविधांचा अभाव असतानाही केवळ स्वकष्टावर त्यांनी हे यश मिळवले आहे. त्यांच्या या उत्तुंग यशामुळे केवळ आरडव गावच नव्हे, तर संपूर्ण लोणार तालुक्याची मान अभिमानाने उंचावली आहे.

दीपक जायभाये यांच्या या यशामुळे स्पर्धा परीक्षांचा अभ्यास करणाऱ्या ग्रामीण भागातील तरुणांना मोठी प्रेरणा मिळाली आहे. त्यांच्या या यशाबद्दल विविध स्तरांतून त्यांचे अभिनंदन केले जात आहे.

बातमी आणि जाहिरात साठी संपर्क करा : ९८६०४९४८०७ ——— बातमी आणि जाहिरात साठी संपर्क करा : ९८६०४९४८०७