वादळ-पावसाच्या छायेत चोरांचा डल्ला! लोणारमधील ब्राह्मण वेळाळ भागात मोठी घरफोडी

लोणार (गावकरी टाईम्स/ फिरदोस खान पठाण):

बुलढाणा जिल्ह्यातील लोणार शहरात मध्यरात्री एक अत्यंत धाडसी घरफोडीची घटना उघडकीस आली आहे. शहरातील ब्राह्मण वेताळ परिसरातील रहिवासी सुनील नवरतमल रामावत यांच्या बंद घराला अज्ञात चोरट्यांनी लक्ष्य करत कपाट, लोखंडी अलमारी आणि सोफ्यांची उथलापाथल केली. या घटनेत घरातील लाखों रुपयांचे सोन्या-चांदीचे दागिने आणि नगदी रोकड चोरट्यांनी लंपास केली असून संपूर्ण परिसरात घबराटीचे व खळबळजनक वातावरण पसरले आहे.

"आमच्या WhatsApp ग्रुपला जॉईन होण्यासाठी येथे क्लिक करा"

नेमकी घटना काय घडली?

सुरक्षेच्या कारणास्तव घर सोडले:

मिळालेल्या माहितीनुसार, सुनील रामावत यांची ब्राह्मण वेताळ भागात जुने आणि नवीन अशी समोरासमोर दोन घरे आहेत. गुरुवारी दिवसभर लोणार शहरात व परिसरात जोरदार वारा आणि पाऊस सुरू होता. जुन्या घराजवळ असलेले मोठे लिंबाचे झाड वाऱ्यामुळे घरावर कोसळण्याची भीती निर्माण झाली होती. त्यामुळे सुरक्षेचा उपाय म्हणून रामावत कुटुंबीयांनी गुरुवारी रात्री जुन्या घराला कुलूप लावून समोरील नवीन घरात झोपायला गेले.

मध्यरात्री चोरट्यांचा डल्ला:

कुटुंब घरात नसल्याची संधी साधत अज्ञात चोरट्यांनी मध्यरात्री सुमारे १ ते ३ वाजेच्या दरम्यान जुन्या घराचे कुलूप तोडून आत प्रवेश केला. चोरट्यांनी घरातील प्रत्येक खोलीची बारकाईने झडती घेतली. घरातील कपाट, लोखंडी अलमारी, धान्याच्या कोठ्या, सोफे आणि डबे फोडून सर्व साहित्य अस्तव्यस्त केले.

लाखोंचा ऐवज गायब:

कपाटात व इतर ठिकाणी सुरक्षित ठेवलेले सोन्या-चांदीचे मौल्यवान दागिने, रोख रक्कम व इतर किमती वस्तू चोरट्यांनी लांबवल्या. प्राथमिक माहितीनुसार लाखांचा मुद्देमाल चोरीला गेला असून, नेमका किती रुपयांचा ऐवज चोरीला गेला याचा आकडा पंचनाम्यानंतर स्पष्ट होणार आहे.

शुक्रवारी सकाळी उघडकीस आला प्रकार

शुक्रवारी सकाळी रामावत कुटुंब जुन्या घरी गेले असता त्यांना घराचे कुलूप तुटलेले आणि आतील सर्व सामान विस्कटलेले दिसून आले. कपाटांची मोडतोड झालेली पाहून त्यांना घरफोडी झाल्याचे लक्षात आले.

घटनेची बातमी परिसरात वाऱ्यासारखी पसरताच स्थानिक नागरिकांनी घटनास्थळी मोठी गर्दी केली.

पोलीस घटनास्थळी दाखल; रात्रीच्या गस्तीची मागणी

घटनेची माहिती मिळताच लोणार पोलीस तातडीने घटनास्थळी दाखल झाले. पोलिसांनी घटनास्थळाचा पंचनामा केला असून अज्ञात चोरट्यांविरोधात गुन्हा नोंदवून त्यांचा शोध सुरू केला आहे.

नागरिकांमध्ये भीतीचे वातावरण:

या धाडसी घरफोडीमुळे लोणार शहरातील नागरिकांमध्ये भीतीचे वातावरण निर्माण झाले आहे. गुन्हेगारांचा तातडीने बंदोबस्त करावा आणि रात्रीच्या वेळी पोलिसांची गस्त वाढवावी, अशी जोरदार मागणी परिसरातील नागरिकांकडून केली जात आहे.

बातमी आणि जाहिरात साठी संपर्क करा : ९८६०४९४८०७ ——— बातमी आणि जाहिरात साठी संपर्क करा : ९८६०४९४८०७