गुन्ह्यात मदत करण्यासाठी आणि पोलीस कोठडी (PCR) वाढवू नये यासाठी ५ हजार रुपयांची लाच स्वीकारणाऱ्या बिबी पोलीस ठाण्याच्या पोलीस हेडकॉन्स्टेबलला लाचलुचपत प्रतिबंधक विभागाने (ACB) रंगेहात पकडले आहे. या धडाकेबाज कारवाईमुळे पोलीस वर्तुळात प्रचंड खळबळ उडाली आहे.
काय आहे सविस्तर बातमी?
मिळालेल्या माहितीनुसार, लाचखोर पोलीस कर्मचाऱ्याचे नाव सतीश रामभाऊ नागरे (वय ४० वर्ष, पद- पोलीस हेडकॉन्स्टेबल ब.नं. १९७९, रा. जऊळका, ता. सिंदखेडराजा) असे असून तो बीट जमादार म्हणून बिबी पोलीस स्टेशन येथे कार्यरत आहे.
तक्रारदार यांच्या भाऊ व पुतण्याविरुद्ध बिबी पोलीस ठाण्यात एक गुन्हा दाखल होता. या गुन्ह्यात घेतलेला पोलीस कोठडी रिमांड (PCR) वाढवू नये तसेच गुन्ह्यात मदत करण्यासाठी बीट जमादार सतीश नागरे याने तक्रारदाराकडे ६,००० ते ७,००० रुपयांच्या लाचेची मागणी केली होती. याप्रकरणी तक्रारदाराने लाचलुचपत प्रतिबंधक विभाग (ACB), बुलढाणा यांच्याकडे तक्रार नोंदवली.
लाचेची मागणी सिद्ध आणि जाळ्यात पकडले:
तक्रारीच्या आधारे एसीबीच्या पथकाने दिनांक २८ जुलै २०२६ रोजी लाच मागणी पडताळणी कारवाई आयोजित केली. यामध्ये पोलीस अंमलदार सतीश नागरे याने पंचांसमक्ष तडजोडीअंती ५,००० रुपये लाच स्वीकारण्यास संमती दर्शवली.
त्यानंतर आज, दिनांक २८ जुलै २०२६ रोजी लोणार तालुक्यातील ग्राम किनगाव जटू येथील बस थांब्यावर एसीबीने सापळा रचला. तक्रारदाराकडून तडजोडीअंती ठरलेली ५,००० रुपयांची लाच स्वीकारताना सतीश नागरे याला रंगेहात पकडण्यात आले. नागरेविरुद्ध भ्रष्टाचार प्रतिबंधक अधिनियम १९८८ अन्वये गुन्हा दाखल करण्याची प्रक्रिया सुरू आहे.
मार्गदर्शन व कारवाई पथक:
सदर धडाकेबाज कारवाई अमरावती परिक्षेत्राचे पोलीस अधीक्षक श्री. बापू बांगर, अपर पोलीस अधीक्षक श्री. सचिंद्र शिंदे, आणि बुलढाणा घटक पोलीस उपअधिक्षक श्री. भागोजी चोरमले यांच्या मार्गदर्शनाखाली सापळा अधिकारी पोलीस निरीक्षक श्री. विलास गुसिंगे आणि एसीबीच्या सापळा पथकाने पार पाडली.
ACB चे आवाहन:
कोणत्याही शासकीय कर्मचाऱ्याने/लोकसेवकाने कामासाठी लाचेची मागणी केल्यास नागरिकांनी न घाबरता लाचलुचपत प्रतिबंधक विभाग, बुलढाणा यांच्या दूरध्वनी क्र. ०७२६२-२४२५४८, व्हॉट्सॲप क्र. ९४०५०९१०६४ किंवा टोल फ्री क्र. १०६४ वर संपर्क साधावा, असे आवाहन पोलीस उपअधिक्षक भागोजी चोरमले यांनी केले आहे.
.jpeg)
0 Comments